Ecoblog

A emoción está servida en calquera dos enfrontamentos do Ecopreguntoiro. Pero nesta ocasión, os alumnos CEIP Anxo da Garda (A Coruña) e os rapaces do Vilar de Barrio (Ourense) casi esgotan as reservas de preguntas de desempate. Ata catro cuestións precisaron para decidir que serán os da cidade herculina os que pasen a eliminatoria.

Despois da súa primeira experiencia nas ondas, quixeron facernos partícipes da súa preparación para cuartos de final nas aulas do colexio e, de paso, presentarse a todos os seus compañeiros de concurso.

“Somos o equipo do Anxo da Garda e estamos encantados de que nos désedes a oportunidade de participar neste concurso, pois son temas que nos gustan. Fíxonos moita ilusión cando nolo propuxo a nosa titora e temos que confesar que estamos un pouco nerviosos.

Miguel, Diego, Juan, Martín e Daniel son os compoñentes do equipo coruñés do CEIP Anxo da Garda.

Agora xa pasamos a primeria eliminatoria. Aínda que os nosos contrincantes fixérono moi ben, nós tivemos a sorte de resolver a pregunta do desempate. De todas as maneiras, só a experiencia de ir á radio xa compensaba a nosa participación.
Estamos preparándonos para o seguinte programa con moitas ganas e estamos ansiosos por saber quien serán os nosos rivais”

O Ecopreguntoiro descansa esta semana, con motivo do Entroido. Quen non o fai e Ecovoz, que emitirá un resumen das eliminatorias xa disputadas, así como unha selección de entrevistas. Será, como sempre, o xoves ás 4 da tarde en Radio Voz.

Coa renuncia do CEIP Irmáns Villar de Ourense, actual campión, a quen lle toca defender o título do Ecopreguntoiro é ao Fogar. Os carballeses fixéronse co título fai agora dous anos e, segundo nos contan, veñen con moitas ganas na actual edición.

As súas mestras contan que están preparando con moita ilusión a xornada de mañá, onde medirán as súas forzas co colexio Seis do Nadal (Vigo).

De feito, mandan unha redacción de presentación:

“Somos María, Aarón, Pablo, Alberto e Juanjo, de 6º nivel, que temos a sorte de poder representar ao noso colexio, o Fogar, no concurso Ecopreguntoiro.

Desde o intre que nos comunicaron a noticia estamos moi inquedos, pero ao mesmo tempo tamén estamos desexosos de que chegue o día porque vai ser a nosa primeira experiencia na radio.

Temos moita ilusión por facelo ben e imos facer todo o posible por gañar, pero sabemos que xa somos afortunados por estar neste concurso e que o que verdadeiramente importa é participar.

Como había que nomear un voceiro e un suplente, por sorteo queda como voceira a rapaza do grupo, María, e como suplente, Aarón.

A nosa primeira intervención, e esperamos que non sexa a última, é o xoves 17 de febreiro. Oxalá que teñamos sorte!”.

Dende Ecovoz, agardamos que o resto dos participantes nos vaian facendo chegar as súas primeiras impresións da experiencia da radio.

A aparente tranquilidade dos alumnos de sexto de primaria diante dos micrófonos múdase en nervios segundos antes de comezar a súa participación no concurso. Respostas hainas para todos os gustos: uns prefiren cantar para liberar tensión, outros permanecen calados para pasar máis desapercibidos e hai que fala rápido, tan rápido que nin sequera o entenden os compañeiros.

O son do Ecopreguntoiro é sempre o mesmo. Tan pronto como comeza o cronómetro resposta tras resposta, as follas dos libros pasan tan axiña de un tema a outro que conforman a música característica do concurso.

Polo momento, xa coñecemos a dous participantes nos cuartos de final.  O CEIP Cabanas (Pontevedra) non o tivo nada fácil para desfacerse do Miralba (Vigo), pero a pregunta de desempate púxose do lado dos primeiros, que acadaron o posto na seguinte rolda no último suspiro. Teranse que ver as caras co colexio de As Nogais, que comezou moi forte ao desfacerse por 9-3 do Felipe de Castro (Noia).

Este xoves será o turno dos gañadores do 2009, o CEIP Fogar (Carballo), que se medirá ao Seis do Nadal (Vigo). Sorte a ambos!