Oxalá a noticia que estes días publican os periódicos sobre John Edgar Hoover non sexa certa. Tal como conta un libro que acaba de aparecer nos Estados Unidos, o mítico xefe do FBI, que dirixiu con man de ferro a policía federal americana durante preto de cincuenta anos, adoitaba vestirse de muller para participar en festas e orxías sexuais que se celebraban nun luxoso hotel de Nova York. Sen pretender furgar de maneira morbosa na vida privada de ninguén, a noticia sobrepasa os límites da intimidade e ten interese para todos.
Como é sabido, á fronte do seu departamento, Hoover actuou cunha dureza desapiadada contra os que el consideraba os inimigos do país, entre eles moitos intelectuais, actores e directores de cine, algúns dos cales foron acusados de traizón, frecuentemente con probas fabricadas, e enviados ao cárcere. Foi tanto o poder que acumulou este home, que todos lle temían, incluso o presidente Kennedy.
Parte da eficacia de Hoover baseábase no ríxido puritanismo da súa vida privada, que el mesmo foi rodeando coa lenda dunha exemplaridade sen mácula. Con fama de honesto e incorrupto, o coñecido policía caía como un ciclón sobre as debilidades humanas dos demais, especialmente as que tiñan que ver co sexo, que empregou como un ariete demoledor contra as súas numerosas vítimas. Se agora resultase certa a sórdida historia que se lle atribúe, a humanidade tería engadido outra páxina negra ao libro gordo do cinismo.
Esta columna publicouse orixinalmente o 7 de febreiro de 1993.