La Voz de Galicia
Recuperación diaria das columnas de Á Marxe, escritas por Carlos Casares en "La Voz de Galicia"
Seleccionar página

Falando de Beiro, acórdome hoxe do señor Ramón Tabao, de quen eu pensei moi mal durante algún tempo, pois escoitara dicir que non era bo e que nunca fora á misa. Tiña ademais un aspecto raro, que contribuía a reforzar a idea de que algunha relación debía manter co demo: era pequeno e andaba medio encollido. Un primo meu, imaxinativo e asustado, contoume que unha vez sorprendera aquel vello ao pasar por diante da igrexa parroquial e que lle vira facer a puñeta contra Deus Noso Señor.

O señor Tabao pasaba por ser home con lecturas, sobre todo en materia de relixión. Aínda recordo o medo que collín o día que lle escoitei dicir no forno, mentres eu agardaba por unhas patacas que me estaban asando, que el, cando morrera, quería ir ao inferno. Pareceume un bárbaro, moito peor do que me contaran.

Unha tarde, xogando no cruceiro, ao velo vir, quíxenme esconder, con tan mala sorte que caín dun muro. Entón el achegouse, axudoume a levantar do chan e limpoume as areas dun xeonllo que mancara. Logo levoume ata a casa e púxose a falar coa miña nai con moita calma. Díxolle que a noite anterior lle parira unha vaca e que estaba moi contento. Antes de marchar, volveuse cara a min e preguntoume se quería ver o becerriño. Aínda que con temor, fun canda el. Trataba o animal igualiño que se fose un neno.

Esta columna publicouse orixinalmente o 21 de maio de 1996.