La Voz de Galicia
Recuperación diaria das columnas de Á Marxe, escritas por Carlos Casares en "La Voz de Galicia"
Seleccionar página

Pasei a mañá de onte revolvendo entre os libros da Feira do Libro Vello que se celebra estes días no Paseo de Recoletos, en Madrid. Aínda que non son bibliófilo e polo tanto descoñezo o pracer, probablemente intenso, de perseguir primeiras edicións, gústanme este tipo de mostras, en parte porque en moitos dos volumes que se venden é posible descubrir dedicatorias autógrafas dos propios autores ou escritos dos antigos propietarios, con frecuencia nada máis que informativas, pero ás veces curiosas ou raras.

Por exemplo, tiven nas mans unha biografía de Lucrecia Borgia que niso que se chaman as páxinas de respecto, concretamente na primeira, debaixo do título, dicía: “Soy de Pepita Marrana”. A frase estaba escrita nunha letra preciosa, a pluma, como se a beleza da caligrafía pretendese dulcificar a inxustiza imposta polo destino.

Nunha das casetas atopei algo que andaba buscando: un libro de Julio Camba, ese grande escritor esquecido. Era un exemplar ben conservado, cunha desas portadas alegres e sinxelas dos anos vinte, autenticamente goloso. Xa tiña decidido compralo, cando descubrín que no seu interior alguén escribira:“Maldición a quien venda o compre este libro”. Sentín que se me augaba a festa, sobre todo polas seis mil pesetas que custaba. E por riba, sen a seguridade de que non se está metendo unha desgraza na casa.

Esta columna publicouse orixinalmente o 24 de abril de 1994.