La Voz de Galicia
Recuperación diaria das columnas de Á Marxe, escritas por Carlos Casares en "La Voz de Galicia"
Seleccionar página

Desde onte pola tarde estou en París, para participar nunha destas reunións de escritores que se adoitan celebrar ao amparo do Salón do Libro. Nada máis chegar ao hotel, no centro de Montparnasse, un barrio que eu amo máis que ningún outro desta cidade, púxenme a revisar os regalos que tiña no cuarto: unha libreta encadernada en tea, coas follas en branco, que me servirá para debuxar macacos; cinco ou seis invitacións para xantares, almorzos e ceas; unha carteira con libros e unha bolsa de auxilio: tesoiras, botóns, agullas…

O que máis me gustou foron as tesouras, sobre todo porque son pequeniñas. Un amigo meu di que para el son imprescindibles, igual que lles sucede a moitas persoas cos somníferos, que necesitan levalos no peto aínda que non fagan uso deles.  Desde neno soña que se lle descosen os pantalóns en público.

Dos libros, había unha guía preciosa de París, unha desas marabillas que se fan agora, chea de fotografías espléndidas. Boteime por riba da cama e púxenme a mirala con entusiasmo, incluídas as páxinas que lle dedica ao hotel, nas que se eloxia o estilo art decó do vestíbulo. Ata que de súpeto me decatei da estupidez que estaba facendo: mirar en fotografía o que podía mirar en vivo. De maneira que fun ver a decoración da entrada e logo marchei dar un paseo por Montparnasse. Total, para rematar entrando nunha librería.

Esta columna publicouse orixinalmente o 18 de marzo de 1995.